വക്ക്പൊട്ടിയ സ്ലേറ്റും വെള്ളമഷിത്തണ്ടും

ബാല്യകാലത്തിന്റെ അറ്റത്ത്‌
കൈവീശിപ്പിരിയുന്നേരം
എനിക്ക് നീ തന്നത്
ഒരു കറുത്ത കൊത്തങ്കല്ല്..

നിനക്ക് പകരം തരാന്‍
എന്റെടുത്തുണ്ടായിരുന്നത്
വക്ക് പൊട്ടിയൊരു സ്ലേറ്റും
വെള്ളമഷിത്തണ്ടും മാത്രം..

എങ്കിലും അന്നത്തെ
ആ 'കൊടുക്കല്‍ വാങ്ങല്‍'
വേണ്ടിയിരുന്നില്ലെന്ന്
മനസ്സിപ്പോള്‍ പറയുന്നു..

നീ തന്ന കല്ലുപോലെയാണ്
എന്റെ മനസ്സെങ്കിലും
നീ കൊത്തിവെച്ച ഇഷ്ടം
ഇന്നുമീ കരിങ്കല്‍ മനസ്സിലുണ്ട്..

പക്ഷെ നിന്റെ മനസ്സ്
ആ സ്ലേറ്റു പോലെയായിരുന്നോ?
ഞാന്‍ തന്ന വെള്ളമഷിത്തണ്ട് കൊണ്ട് തന്നെ
നീയാ സ്നേഹവും മായ്ച്ചു കളഞ്ഞോ പെണ്ണെ?..

__________________________© മോന്‍സ്

# ചിത്രം ഗൂഗിളില്‍ നിന്നും ചൂണ്ടിയത്..